Конференция жұмысына кеңестің 40 астам мүшесі қатысып, жиын мандат комиссиясының есебімен басталды. Күн тәртібіне өңірде ардагерлер кеңесінің ұйытқы болуымен қолға алынған жобалар шығарылды. Жиынға арнайы қатысқан аймақ басшысы Дастан Рыспеков көргені мен түйгені көп қазына қариялардың қоғамдық іс шаралардағы белсенділігіне тоқталды.

Жиын барысында бірқатар қатысушыға облыс әкімінің Құрмет грамоталары табысталды. Одан кейін облыстық ардагерлер кеңесінің төрағасы Сағындық Қожамсейітов есептік баяндама жасап, өңірде 147 мұқтаж жанға қамқорлық көрсетіліп отырғанын атап өтті. Сондай-ақ отбасы институтын нығайту бағытындағы жұмыстардың жүйелі жүргізіліп жатқаны, 17 ауланың абаттандырылып, бірқатар әлеуметтік жобалардың жүзеге асырылғаны айтылды. Отырыс қорытындысында «Ардагерлер ұйымы» РҚБ-ның XI съезіне екі делегат сайланып, Ұлытау облыстық ардагерлер кеңесінің жаңа төрағасы болып Мұрат Қазамбаев сайланды.

Қатысушылар алдағы уақытта да аға буынды әлеуметтік қолдау және қоғамдық бастамаларды дамыту жұмыстары жүйелі түрде жалғасатынын атап өтті. Бұл өз кезегінде мемлекеттік органдар мен ардагерлер қауымдастығы арасындағы байланыстың нығая түсуіне серпін бермек.

АЙДАНА БАЗАРБАЙҚЫЗЫ, АЛИХАН МҰХТАР «ҰЛЫТАУ» ТЕЛЕАРНАСЫ