АМАЛ КЕЛДІ, ЖЫЛ КЕЛДІ!

Он күнге жоспарланған Наурыз мерекесінің алғашқы күні – өткен сенбі 14 ші наурызда Көрісу, яғни Амал мерекесімен бастауын алды! Аталған мейрамда облыс орталығында ашық аспан астында құрылған сахнада «Көрісу — бабалардың аманаты» атты мерекелік шара өтті...

Шараның басты мақсаты – қазақ халқының көне салтының бірі саналатын Көрісу күнінің мән-маңызын насихаттап, ұрпақтар сабақтастығын дәріптеу. Мерекелік бағдарлама ұлттық дәстүрге негізделген театрландырылған көрініспен басталды. Ұлытаулықтарды жыл басымен облыс әкімінің орынбасары Зина Ақылбекова құттықтады.

Мерекелік бағдарламаның тағылымды тұсы – ақсақалдың батасы болды. Ақсақалдар жастарға ақ тілегін арнап, елдің амандығы мен берекесін тіледі. Ал, жиналған жұртшылық бір-біріне қос қолдап сәлем беріп, «Бір жасыңызбен!» деп ізгі тілектерін білдірді.

Айта кетейік, Амал мерекесіне арналған мерекелік концертті Тайжан Қалмағанбетов атындағы облыстық филормония мен облыстық әмбебап кітапхана ұжымы бірлесе ұйымдастырды!