ОТБАСЫЛАРҒА КЕШЕНДІ ҚОЛДАУ КӨРСЕТІЛЕДІ

Биылғы жылдың 15 мамырынан бастап облыс орталығында Отбасын қолдау орталығы жұмысын бастады. Жаңа мекеме қиын өмірлік жағдайға тап болған отбасыларға, соның ішінде тұрмыстық зорлық-зомбылықтан зардап шеккен азаматтарға кешенді қолдау көрсетеді. Негізгі мақсат - мәселені дер кезінде анықтап, отбасылардың дағдарыс жағдайынан шығуына ықпал ету.

Орталықтың ашылуы - отбасы институтын нығайтуға, азаматтардың құқықтарын қорғауға және тұрмыстық зорлық-зомбылықтың алдын алу жұмыстарын күшейтуге бағытталған маңызды қадам. Бұл жерде түрлі мемлекеттік органдар мен салалық мамандардың өзара іс-қимылы бір алаңға тоғыстырылған.

«Жезқазған қаласының Отбасын қолдау орталығы өмірлік қиын жағдайға тап болған отбасыларға, оның ішінде тұрмыстық зорлық-зомбылықтан зардап шеккен азаматтарға кешенді көмек көрсетеді. Мұнда психологиялық, заңгерлік және әлеуметтік қолдау мен профилактикалық жұмыстар жүргізілмек. Біз құқық қорғау органдарымен және басқа да мекемелермен бірлесіп жұмыс істейміз. Негізгі мақсатымыз – әр азаматтың өзін қауіпсіз сезінуіне, өз құқығын біліп, қажетті көмекті дер кезінде алуына жағдай жасау»

— Наталья Шепель, Жезқазған қаласының Отбасын қолдау орталығының директоры

Орталық қызметінде тұрмыстық зорлық-зомбылықтың алдын алу, әйелдер мен балалардың құқықтарын қорғау басым бағыттардың бірі. Бұл жұмыстардың тиімділігі құқық қорғау органдарымен үйлесімді өзара іс-қимыл арқылы қамтамасыз етіледі.

Орталық жұмысын бастағалы бері 58 өтініш түскен. Басым бөлігі бойынша консультациялық көмек көрсетілсе, басқа жағдайда түрлі сала мамандары жұмылдырылып, кешенді қолдау ұйымдастырылды. Оның екеуі тұрмыстық зорлық-зомбылық фактілеріне қатысты болды. Осы уақыт ішінде 27 азамат психологиялық, 11 адам заңгерлік және 22 тұрғын әлеуметтік қолдау алған.