Бүкіләлемдік теледидар күні құтты болсын! ULYTAU TV — 67 жыл эфирде
1959 жылы Жезқазғанда жанған экран бүгін де сөнген жоқ. Құрметті көрермен, мерекеңіз құтты болсын!

Құрметті көрермендер! Бүгін — Бүкіләлемдік теледидар күні. ULYTAU TV ұжымы сіздерді осы мерекемен шын жүректен құттықтайды!
Біздің арнаның тарихы 1959 жылы басталды. Қаныш Сәтбаев негізін қалаған Жезқазған кен-металлургия комбинатының инженерлері әуесқой телестудия құрып, 5 қыркүйекте алғашқы эфирді шығарды. Сол күннен бері Ұлы даланың төріндегі көгілдір экран бір сәтке де сөнген жоқ.
1960 жылы Жезқазған телестудиясы ресми құрылды. 1992 жылы арна республикада бірінші болып жеке екінші бағдарламалар толқынын шығарды — «Дидар» осылай дүниеге келді. Облыс таратылған қиын жылдарда да, жекешелендіру дауы кезінде де ұжым арнаны сақтап қалды. Бүгін «Дидардың» заңды жалғасы — ULYTAU TV жаңа Ұлытау облысының шежіресін күн сайын жазып келеді.
Биыл арнаға 67 жыл толды. Осы жылдар бойы бізбен бірге болған, жаңалықтарымызды көріп, бағдарламаларымызды қолдап, ойын білдірген әрбір көрерменге алғыс айтамыз. Сіздердің сеніміңіз — біздің ең үлкен жетістігіміз.
Арнаның іргетасын қалаған ардагерлерге, бүгінгі журналистерге, операторларға, режиссерлерге, монтаж шеберлері мен техникалық мамандарға — экранның арғы жағында еңбек етіп жүрген барша әріптестерімізге алғыс білдіреміз!
Экраныңыз сөнбесін, мерекеңіз құтты болсын!


