Ұлытау үні ұлттың үні

Қазақстанның Құрметті журналисі, Ұлытау ауданының Құрметті азаматы, ақпарат саласының ардагері Мағзұмбек Машайықұлының есімі ұлытаулықтарға етене таныс. Тұтас ғұмырын туған жерінің тарихын зерделеп, көрген-білгенін қағазға түсіріп, мәйекті мақала, өрелі өлең еткен Мағзұмбек ақын 85 тің биігіне шықты. «Ұлытау үні» фестивальі бағдарламасына енген «Өлеңмен өрілген өмір» атты шығармашылық кеш ақсақалдың ғибратты ғұмыр жолының айқын көрінісі... 

 Ұлытау Облысы әкімі аппаратының басшысының құттықтауынан кейін сахнаға Ұлытау ауданының әкімі мен мәслихат төрағасы және Сәтбаев қаласы әкімінің орынбасары көтеріліп кеш иесіне деген сый-құрметтерін жасады. 

Кеш барысында ақын Мағзұмбектің жырлары оқылып, журналист Мағзұмбектің сырлары шертілді. Өлкетанушы Мағзұмбектің өзге де қырлары ашылды. 

 Тіршілігінде тілшілік қызметіне адал болған қаламгердің қаламы әлі де қолында. Алақанға салған халқына ақ жүректің алғысын айтқан ақсақал өңір дамуына деген тілегін жеткізді кеш соңында...

Ұлытаудың ұлының шығармашылық кеші – «Ұлытаудың үнінін» көрігін қыздырып, мәртебесін асырды! 

Үш күн бойы Ұлытау сахнасын дүбірге бөлеген «Ұлытау үні» - фестиваль жеңімпаздары мен жүлдегерлерінің қатысуымен өткен гала-концертпен қортындыланды. 

Биылғы фестивальдің ерекшелігі - Жошы ұлысының 800 жылдығына арналған республикалық мульти аспапшылар конкурсының Қазақстан бойынша алғаш рет өтуі болды. Ал, Ұлытау және Қостанай облыстары арасындағы командалық айтыс пен мемлекет және қоғам қайраткері Сәкен Сейфуллиннің 130 жылдығына арналған «Сарыарқа саңлақтары» атты республикалық дәстүрлі әншілер байқауы өнер жәрмеңкесін қыздыра түсті.  

 Ұлытау өңірі өнерін өрге сүйреген Береке Көшенов пен Мағзұмбек Машайықұлының шығармашылық кештері де өз деңгейінде өтті. Айта кетейік, гала-концертке ұлттық аспаптарды дәріптіп жүрген «Алатау серілері» тобы арнайы шақырылған.

Әуелет ән шырқалды, күмбірлете күй шертілді. Дәстүр дәріптелді, ұлттық рух аспандады. Осылайша «Ұлытау үні» фестивальінің 32 ші маусымы да тарих қойнауына бет алды...

Мұқағали Сейтқазы, Гүлім Маратқызы, Думан Оразов, Мейіржан Мейрамұлы, Айдос Өмірбекұлы, Сергей Майкович,   «Ұлытау» телеарнасы