Облыс әкімінің жұмыс сапары

11 мыңға жуық халқы бар Жәйрем кентінде кезек күттірмейтін мәселелердің дені коммуналдық салада. Ұлытау облысы құрылғалы аталған саладағы проблемалар кезең-кезең арқылы жүзеге асырылуда. Өңір басшысы кент орталығындағы жүргізіліп жатқан кәріз құбырларын жаңарту жұмыстарымен танысты. 

Берік Әбдіғалиұлы мердігер компания өкілдеріне жұмыстарды тапсыру уақытын кешіктірмеуді міндеттеді. 

Кентте кейінгі жылдары - мектепке дейінгі білім беретін мекеменің тапшылығы жиі айтылып жүрген. Ендігі бұл мәселе де шешімін табуда. Облыс әкімі жұмыс сапары барысында 125 орындық еңселі екіқабатты жаңа балабақшаның ашылу салтанатына арнайы қатысты. 

Балабақша заманауи үлгіде салынған, балалардың жан-жақты дамуына мүмкіндік беретін заманауи даму алаңдарымен, STEM кабинетімен, хореография залы және емдік тұзды бөлмемен жабдықталған. Ерекшелігі сол, мұндағы топтарға Абай, Ыбырай, Қаныш сынды ұлт зиялыларының есімі берілген.

Жеке кәсіпкер қазірдің өзінде 20 маманды жұмыспен қамтуда. Айта кетейік, осы уақытқа дейін кентте бір мемлекеттік балабақша жұмыс істеп келген...

Әкім сапары Қаражал қаласында жалғасын тапты. Мұнда Берік Әбдіғалиұлы шаһар тұрғындарымен кездесу өткізді. Аталған жүздесуге облыстық басқарма басшылары да қатысты. Алдымен қазыналы даланың қазіргі ахуалынан қала әкімі Айқын Елесусізов жан жақты ақпарат берді. Қаланы дамытудың бас жоспары бекітілген. Қала көркін бұзып тұрған ешкім тұрмайтын ескі үйлер сүріліп, құрылыс қарқын алған. Коммуналдық салада да жаңалықтар жетерлік...

Тұрғындар тарапынан түрлі сауалдар қойылды. Қалаға қарасты Ақтай елді мекені мен қала орталығындағы мәселелер осы жиында көтерілді. Берік Әбдіғалиұлы жергілікті билік өкілдеріне халықпен тығыз қарым қатынаста жұмыс істеуді тапсырды. 

Жүздесу жиынынан кейін облыс әкімі азаматтарды жеке мәселелері бойынша қабылдады. Қабылдауға алдын ала 6 тұрғын жазылған. Олардың мәселелері салаға жауапты басқарма басшығына жүктелді. 

Жеке қабылдаудан кейін өңір басшысы қала орталығында салынып жатқан жаңа әкімшілік ғимарат пен жабық бассейннің құрылыс алаңында болды. Аталған нысандар жыл соңына дейін аяқталады деп күтілуде. 

Мұқағали Сейтқазы, Мейіржан Мейрамұлы, «Ұлытау» телеарнасы