ГАЗЕТ ТЫНЫСЫ

Ulytautv 25-июн, 10:20 0 ЖАҢАЛЫҚТАР / ҰЛЫТАУ ОБЛЫСЫ

Ұжымның байыпты да ұйымдасқан тірлігінің арқасында басылым байырдан оқырмандардың ықыласына бөлене білген. Оның алғашқы саны 1997 жылы 12 қазанда жарыққа шықты.Жезқазған мен Сәтбаев қалаларының ақпарат кеңістігінде газет өз орнын бірден тапты. Ол бастан-ақ шынайы әрі терең ойлы басылым ретінде танылды.Әсіресе қарапайым еңбек адамдарын, жұмысшылар мен қала тұрғындары туралы жазуға басымдық берді. Тек жаңалық жеткізіп қана қоймай, сол жаңалықтың астарына үңіліп,әрбір деректің мән-мағынасының ашылуы газеттің басты ұстанымы.

Нина БАРБУТЬКО «Подробности» газетінің бас редакторы

Подробности» — бұл кезінде Жезқазғантүстіметалл өндірістік бірлестігінде жарық көрген көптиражды «Заметь» газетінің ізін жалғаған басылым. Сондықтан да біздің алғашқы беттерімізден бастап еңбек адамдарының галереясы, құрмет тақтасы үздіксіз толығып келеді. Сол үрдіс бүгінде де үзілмей, жалғасып келеді. Біз тек қызықты ғанаемес, сонымен қатар оқырман күнделікті өмірінде пайдалана алатын пайдалы ақпаратты да ұсынамыз. Біздің газетіміздің негізгі бағыты да дәл осыған негізделген.

Ақпарат нарығы жыл сайын жаңарып, бәсекелестік артып келе жатса да, «Подробности» өз бағытынан айныған емес. Қоғамдағы түйткілді мәселелерге терең бойлап, мазмұнды мақалалары мен кәсіби тілшілерінің арқасында халықтың ықыласына бөленіп келеді. «Подробности» газеті аптасына 1 рет 2500 таралыммен шығып тұрады.Бүгінде Нина Барбутько жетекшілік ететін ұжымда 6 маман жұмыс істейді.

Людмила УЛЬРИХ «Подробности» газетінің журналисі

Мен бұл ұжымда 2001 жылдан бері жұмыс істеймін. Яғни, осы салада 24 жыл уақытым өтті. Бас редакторымыз Нина Андреевна Барбутькоға үлкен алғысымды білдіремін — бізге түрлі тақырыпта еркін жұмыс істеуге жол ашып отыр. Өз ісімді жан-тәніммен сүйемін. Әр күнім — жаңалық. Қайда баратыныңды, қандай оқиғамен бетпе-бет келеріңді, кіммен сұхбаттасатыныңды, қандай талдау жасайтыныңды күні бұрын білмейсің. Бастысы — артықты сылып тастап, шындықтың дәнін ғана оқырманға ұсыну. Бұл мен үшін зор жауапкершілік әрі шексіз шабыт.

Ширек ғасырдан астам уақыт өтті. Қоғам өзгерді,техника дамыды, журналистер мен оқырмандардың буыны ауысты.Бірақ бір дүние өзгерген жоқ - «Подробности» газеті ақиқат пен халық арасындағы сенімді көпір болып қала берді.

АЙДАНА БАЗАРБАЙҚЫЗЫ, АЙДОС ӨМІРБЕКҰЛЫ

«ҰЛЫТАУ» ТЕЛЕАРНАСЫ