Форумға 700-ден астам оқушы мен студенттер жиналды. Қазіргі таңда оңай олжаны көздеген жасөспірімдер синтетикалық өнімді әлеуметтік желілер арқылы сатып жүр. Ағаш-бұтаның түбін тінтіп, тұрғын үйлердің қуыс-қуысын қазып жүр. Күшейтілген күрес жұмыстарына қарамастан, ғасыр індетінің тамырына балта шабу оңай болмай тұр. 

Ерлан ОСПАНОВ Ұлытау облысы ПД есірткі қылмысына қарсы іс-қимыл басқармасының бастығы

Форумның өтуіне үкіметтік емес ұйымдар,  «Respublika» партиясының Ұлытау облыстық филиалы мен полиция департаменті жанынан құралған нашақорлыққа қарсы кеңес мүшелері қолдау көрсетті. Басты мақсат-жастарға ой салу дейді олар.

Светлана ОҢҒАРБАЕВА  нашақорлыққа қарсы күрес жөніндегі кеңестің мүшесі

Тәртіп сақшылары жастарды жаңсақ басудан абай болуға шақырды. Есірткіні таратудың ықтимал жолдары туралы айтып, көрсетті. Өңірде жастармен бірлесіп, есірткі жарнамасы бар граффитті жою бойынша жұмыстар жүргізіліп жатыр. Түрлі акциялар мен байқаулар да өткізіліп тұрады. Сол байқаулардың жеңімпаздары форумда марапатталды.

Іс-шарада есірткі іздеуде ерекше рөл атқаратын – кинологиялық қызмет мамандары мен олардың қызметтік иттері өнерлерін көрсетті. Ал жылдам қимылдайтын арнайы жасақ жауынгерлік әдіс-тәсілдер үлгісін ұсынды. Жалпы, облыс бойынша нашақорлық дерегімен 168 адам есепте тұр. Оның 148-і ер адам, 20-сы әйел. Қуантатыны – есепте тұрған жасөспірімдер жоқ.

ГҮЛІМ МАРАТҚЫЗЫ, АЙДОС ӨМІРБЕКҰЛЫ

«ҰЛЫТАУ» ТЕЛЕАРНАСЫ