СЫБАЙЛАС ЖЕМҚОРЛЫҚ ФАКТІСІ АНЫҚТАЛДЫ

Ulytautv 30-июн, 10:45 0 ---

Сыбайлас жемқорлық туралы хабарлаған адам мемлекеттің қорғауында болады. Жуырда Қарағанды қаласының тұрғыны Ұлытау облысындағы қылмыстық-атқару жүйесі мекемесінің қызметкерлері сотталған күйеуіне интернетке кіруге көмектескені үшін пара алғанын хабарлаған. Азаматшаның дер кезінде шағымдануының нәтижесінде бұл факт тіркеліп, кінәлілер анықталып, тиісті жазаға тартылды. Сыбайлас жемқорлыққа қарсы іс-қимыл Агенттігінің Ұлытау облысы бойынша департаменті азаматтарды сыбайлас жемқорлық құқықбұзушылықтарына бейжай қарамауға және оларды анықтау мен жолын кесуге белсенді атсалысуға шақырады. Мемлекет, өз кезегінде, сыбайлас жемқорлық фактілері туралы хабарлаған адамдарды жан-жақты қорғайды, ал олардың жеке мәліметтерін жариялағандар қылмыстық жауапкершілікке тартылады.

Нина КАРЕЛИНА Қарағанды қаласының тұрғыны

Күйеуім қазіргі кезде жазасын өтеу мекемесінде отыр. Өткен жылы біз бір қиындыққа тап болдық – нақты айтқанда, сыбайлас жемқорлықпен бетпе-бет келдік. Күйеуім маған таксофон арқылы хабарласып, өзі жұмыс істейтін жерде жұмыс орнынан айырылуы мүмкін екенін айтты. Осы жағдай бойынша мекеме қызметкері одан жеңілдіктер мен үнемі байланыста болу мүмкіндігі үшін 50 мың теңге талап еткен.Күйеуіммен сөйлескеннен кейін мен колл-орталыққа қоңырау шалдым, ол жерде мені Ұлытау облысының Сыбайлас жемқорлыққа қарсы қызмет департаментімен байланыстырды. Мен сол жерге ресми түрде өтініш жаздым. Біраз уақыт өткен соң аталған қызметкерлер ұсталып, сотталды.Менің ойымша, біз сыбайлас жемқорлықпен күресуіміз керек. Біздің қолдауымызсыз бұл індетті жеңе алмаймыз. Әрбір азамат, егер ол сыбайлас жемқорлық әрекетіне тап болса, міндетті түрде бұл туралы хабарлауы тиіс. Бұл жағдайда колл-орталыққа хабарласу қажет. Анонимдік толық сақталады.

Сыбайлас жемқорлыққа қарсы қызмет барлық азаматтарды сыбайлас жемқорлық фактілерін білген жағдайда үнсіз қалмай, 1424 нөміріндегі Call-орталыққа қоңырау шалуға немесе +7 777 000 14 24 WhatsApp нөміріне жазуға шақырады.