СЫҢҒЫРЛА, СОҢҒЫ ҚОҢЫРАУ

Ulytautv 26-май, 17:29 0 ЖАҢАЛЫҚТАР / ҰЛЫТАУ ОБЛЫСЫ / ЖЕЗҚАЗҒАН ҚАЛАСЫ

№4 орта мектептің оқушылары кезекті оқу жылын сәтті аяқтады.Болашаққа қадам басқан түлектерге қала әкімінің орынбасары Берік Әбен,мектеп директоры мен ұстаздар жүрекжарды тілектерін арнады.

Берік ӘБЕН Жезқазған қаласы әкімінің орынбасары

Салтанатты шара түлектер шеруімен ашылды.Әнұран орындалды. Мұғалімдер үшін әрбір оқушы – өз баласындай. Өйткені ұстаздық – өз уақытыңды құрбан етіп, өзгеге жол сілтеу. Сынып жетекшілері түлектеріне деген ақжарма тілектерін жеткізіп, оларға ақ жол тіледі.

Мария МЕРЕНКОВА 11 "Б" сыныбының сынып жетекшісі

Мен – 11Б сыныбының жетекшісімін. Бүгін менің 25 оқушым үлкен өмірге қанат қаққалы тұр! Әрқайсысының арманы, талғамы, болашаққа деген жоспарлары бар. Мен оларға жүрегіне жақын, өзіне лайықты бағытты таңдап, үлкен өмірге сеніммен қадам басса екен деймін!

Биыл бұл білім ордасында 1556 оқушы оқу жылын тәмамдады. Бір түлек «Алтын белгіге» үміткер атанып отыр. Жас түлектер алдарында тұрған үлкен жауапкершілікті терең сезінеді. Қолдары гүлге, көздері үмітке толы шәкірттердің алтын ұяларына деген қимастығы жүздерінен байқалады.

Бұл сәтте ата-аналардың да жүректерін ерекше толқу мен қуаныш биледі. Кеше ғана мектепке алғаш қадам басқан кішкентай бүлдіршіндері бүгінде есейіп, үлкен өмір жолына қадам жасап тұр.

Түлектер ұстаздарына арнап ән шырқап, мектеп қабырғасында соңғы рет оқушы ретінде вальс биледі. Салтанат соңын қоңырау сыңғыры түйіндеді.

АЙДАНА БАЗАРБАЙҚЫЗЫ, ДУМАН ОРАЗОВ

«ҰЛЫТАУ» ТЕЛЕАРНАСЫ