ЖЕЗҚАЗҒАНДЫҚ СПОРТШЫ АЗИЯ ЧЕМПИОНАТЫНАН ЖЕҢІСПЕН ОРАЛДЫ

Ulytautv 20-июн, 13:18 0 ЖАҢАЛЫҚТАР / ҰЛЫТАУ ОБЛЫСЫ

Жарысқа Азия құрлығының 16 елінен 270-тен астам спортшы қатысты. Бұл — Тимофей үшін халықаралық жарыстардағы алғашқы тәжірибе. Соған қарамастан ол өзін мықты жағынан көрсетіп, екі бірдей қашықтықта чемпион атанды.

Тимофей ТАРАНОВ Азия чемпионы

Екілік байдаркада 200 метр, ал төрттік байдаркада 500 метр қашықтықта алтын медаль алдым. Бұл менің алғашқы Азия біріншілігім. Бұған дейін тек Қазақстан ішіндегі жарыстарда ғана қатысып келдім. Маған сенім артып, қолдау көрсеткен жаттықтырушыларыма және анама үлкен алғыс білдіремін.

Тимофей Таранов есу спортымен бес жылдан бері айналысады. Осы уақыт ішінде ол өзін мақсатқа ұмтылған, табанды спортшы ретінде танытып үлгерген.

Егор БОРИСОВ жаттықтырушы

Азия чемпионатына Ұлытау облысынан Тұрсын Малика, Таранов Тимофей және Фалалеева Виктория қатысты. Жарысқа дайындықты биыл қаңтар айында бастадық. Жүйелі жаттығу мен нақты мақсат бізге нәтиже берді. Спортшыларымыз намысты қолдан бермей, жоғары нәтиже көрсетті.

Жеңіспен оралған чемпионды туған жерінде ата-анасы, достары мен жерлестері ерекше қуанышпен қарсы алды.

Наталья ТАРАНОВА Т. Тарановтың анасы

Ұлымның осындай жетістікке жеткеніне өте қуаныштымын. Олар Викториямен бірге келді, екеуі де медаль жеңіп алды. Біз олармен мақтанамыз. Алдағы уақытта бұдан да биік белестерді бағындыра беруіне тілектеспін.

Айта кету керек, Тимофей Таранов бұған дейін де бірнеше рет Қазақстан чемпионатында жеңіске жеткен. Ал Азия чемпионатындағы бұл жеңісі – оның спорттық жолындағы маңызды белестердің бірі. Жас спортшының алдағы уақытта әлемдік аренада да еліміздің көк байрағын желбірететініне сеніміміз мол.

АЛМА СӘЛІМЖАНҚЫЗЫ, ДУМАН ОРАЗОВ

«ҰЛЫТАУ» ТЕЛЕАРНАСЫ