Жезқазаған индустриалдық-гуманитарлық колледжі  білім, ғылым, өнер саласында үлкен жетістіктерге қол жеткізді. Осы білім ұясының қабырғасынан түлеп ұшқан түлектер қазір сан-салада жемісті еңбек етіп жүр. Ал, биылғы жылы колледжден 13 мамандық бойынша 298 студент  түлеп ұшты.  Студенттерді Жезқазған қаласы әкімінің орынбасары Берік Әбен бастаған бірқатар құрметті қонақтар құттықтап, түлектердің жаңа қадамына сәттілік тіледі.

Берік ӘБЕН Жезқазған қаласы әкімінің орынбасары

Сонымен қатар, 8 түрлі мамандық бойынша 165 студент жұмысшы біліктілігін иеленді. Бұл көрсеткіш колледжде теориялық біліммен қатар, практикалық дайындықтың да жоғары деңгейде жүргізілетінін айғақтайды. Яғни, түлектер оқу орнын бітіре сала еңбек нарығына дайын маман ретінде жолдама алуда. Айта кету керек, колледж студенттері тек білім алумен шектелмей, түрлі байқаулар мен олимпиадаларда да жоғары нәтижелерге қол жеткізіп жүр. Олар облыстық, республикалық деңгейдегі жарыстарда жүлделі орындарға ие болып, оқу орнының абыройын асқақтатып келеді.

Гульмира ЖҰМАТОВА Ұлытау облысы білім басқармасының бөлім басшысы

Биыл колледждің 9 түлегі үздік дипломға ие болды. Солардың бірі - Еркеназ Алтау. Ол өзінің білімдегі, спорттағы және қоғамдық белсенділігімен өз дарынын жоғары деңгейде дәлелдеді. «Дене шынықтыру және спорт» мамандығын тәмәмдаған Еркеназ  республикалық техникалық және кәсіптік білім беру саласындағы үздік 100 студенттің қатарынан көрінген болатын. Жетістіктерінің барлығы колледж ұстаздары мен ата-анасының қолдауы екенін ерекше атап өтті. 

Жезқазған индустриалдық-гуманитарлық колледжі техникалық және кәсіптік білім беру саласында сапалы оқыту мен кәсіби  бағыт беруде үздік үлгі көрсетіп келеді. Биылғы түлектер – осы жүйелі еңбектің жемісі. Олар алған білімдері мен машықтарын ел игілігі жолында тиімді пайдаланып, жаңа өмір жолында жарқын жетістіктерге жетеді деген сенім мол.

АЛМА СӘЛІМЖАНҚЫЗЫ, АЙДОС ӨМІРБЕКҰЛЫ

«ҰЛЫТАУ» ТЕЛЕАРНАСЫ