ОТБАСЫ КҮНІНДЕ ОТАУ ҚҰРДЫ

Ulytautv 15-май, 12:59 0 ЖАҢАЛЫҚТАР / ҰЛЫТАУ ОБЛЫСЫ

Бүгін «Ахмет Ишан Оразайұлы» мешітінде Әділжан Әбілғазиев пен Батпа Халық некелерін қиды. Әділжан- ішкі істер органдарында қызмет атқарса, Батпа- жас ұрпаққа білім мен тәрбие беріп жүрген ұстаз. Мешітте өткен рәсімде жас жұбайлар өмірлік серттерін беріп, шаңырақ көтерді. Ең бастысы Әділжан құсын қолына қондырғанына ерекше қуанышты.

Әділжан ӘБІЛҒАЗИЕВ Жезқазған қаласының тұрғыны

Бүгін біз үшін тарихи сәт.Бүгін бір ерекше әсердемін. Бүгін отбасы күні және біздің отау тіккен күніміз. Осындай теларнадан келеді,әкімшіліктен келеді деп те ойламаппыз. Толқып тұрмын шыны керек.Және де неке қиюымыз Алланың нәсіп еткені. Толқып та, қуанып та тұрдық. Енді алдағы уақытта ата-анамыз разы болатындай қызмет жасаймыз.

Жастардың қуанышын бөлісуге келгендердің де қарасы қалың. Қала әкімідігінің өкілдері қатысып, жас жұбайларға ақ тілектерін жеткізді.Ақ жаулықты әжелер шашу шашып, бата берді.

Көпбалалы ана жас келіннің иығына ақ орамал жауып, ұлттық дәстүрді ұлықтады. Әділжанның ата-анасы Жанғазы Бейсенәлі мен Кенжегүл Сақтағанова баласының отбасы күнінде отау тіккеніне мәз-мейрам.

Кенжегүл САҚТАҒАНОВА ата-ана

Бұның бәрі біз үшін мақтаныш. Жаңылмай жар таңдағанына қуаныштымын. Балаларымның басы екеу болды. Енді Алла қаласа немере сүйгізсін. Немерелеріме бұл қуанышты сәтті бөлісе отырамын. Ешқандай жамандық көрмесін. Жезқазғанның бетке ұстар азаматтары болсын.

Осындай тағлымды шаралар- отбасы мәртебесін көтеріп, ортақ құндылықтарды дәріптеуге негіз болатын анық. Біз де жас отбасыға ақжарма тілегімізді айтып, қуаныштарына ортақтасып қайттық.

ГҮЛІМ МАРАТҚЫЗЫ АСХАТ ЖАҚСЫЛЫҚ

«ҰЛЫТАУ»ТЕЛЕАРНАСЫ